LEGAZPI CITY-Nadakop kan mga otoridad an Rank 9 Most Wanted Person sa Bicol Region na igwang pigkakahampang na kasong illegal droga, sa ikinasang joint manhunt operation.
Binisto ini na si alias “Win,” na nadakop sa Barangay Sagrada, Minalabac, Camarines Sur sa paagi kan koordinadong pagsisikap kan mga tawohan hale sa Criminal Investigation and Detection Group Camarines Sur Provincial Field Unit (PFU), Minalabac Municipal Police Station, Camarines Sur Police Provincial Office; Camarines Sur Maritime Police Station; 501st Maneuver Company, Regional Mobile Force Battalion 5; 95th Special Action Company, 9th Special Action Battalion, PNP Special Action Force; asin kan NCIT-RIU 5.
Isinagibo an operasyon sa bisa kan Warrant of Arrest na inisyu kan korte kan Agosto 17, 2026.
Nagbabalgar an suspetchado sa Republic Act No. 9165, o bisto bilang Comprehensive Dangerous Drugs Act of 2002,partikular na an Section 5, Article II, na kinaiimbueltuhan kan pagpapabakal, pangangalakal, pagmamando, dispensasyon, paghahatod, pagbabarewas asin transportasyon kan mga ilegal na droga, na warang inirekomendang piyansa.
Nahahampang man siya sa kasong pagbayolar sa Section 11, Article II kan nasabing ley o an pagsasadiri nin peligrosong droga na igwang rekomendadong piyansa na nasa P200,000.
Kasunod kan saiyang pagkakadakop, dinara ini sa CIDG Camarines Sur PFU para sa magkakanigong dokumentasyon asin disposisyon susog sa ley.
Source: Bombo Radyo Bicol