LEGAZPI CITY-Sinabi kan sarong Ekonomista na mantang nagbaba an nairekord kan Philippine Statistics Authority (PSA) na inflation rate na nasa 6.1% sa bulan kan ), mas halangkaw man giraray an inflation sa Bicol Region asin iba pang mga rehiyon.
Segun ki Economist and CPA, Dr. Emmanuel Onsay, sa intrevista kan Bombo Radyo Legazpi, na sa 6.1% an inflation rate kan Agosto poon sa 6.2% kan Hulyo, masasabing positibo ini maski papano, alagad makamundo huli ta halangkaw man girararay ini kun ikukumparar sa ideal inflation benchmark rate kan nacion.
Paliwanag niya na igwang pig-aapod na inflation benchmark rate na iyo an ideal rate na kinakaipuhan, kun sain nasa 4% sana ini pababa.
Tinawan doon man niya na bako maraot an inflation huli ta indikasyon man ini na nagigin maayos asin naglalago an produksyon sa nacion.
Magigin maraot sana suboot ini enkaso maglagpas ini sa pig-aapod na inflation benchmark rate.
Sinabi niya na halangkaw man liwat an 6.1% na nangangahulugang mas marikas an lebel kan paglangkaw kan presyo kumparar sa rikas kan lebel kan paglangkaw kan income o sahod.
Kun hihilingon suboot, basado sa saiyang pag-analisar, mas halangkaw man liwat an porsiyento kan inflation sa Bicol Region.
Dugang pa kan Ekonomista na maski nagbaba an inflation rate sa ideal inflation benchmark rate, mamamatean man liwat an paglangkaw kan presyo sa rehiyon huli sa hababang pasahod asin mas mamamatean an halangkaw na inflation rate.
Nagpagirumdom man ini sa mga konsumidores na an pagbawas sa pagbabakal kan mga bagay na dai tigagamit, an nakakadagdag suboot sa pagbaba kan inflation rate sa nacion.
Source: Bombo Radyo Bicol