LEGAZPI CITY—Nakumpiskar an pocomas o menos P6.8 milyong kantidad nin shabu sa duwang high-value individuals (HVI) sa ginibong buy-bust operation sa Legazpi City.
Binisto an mga suspek na sinda alyas “James”, 25-anyos, asin alyas “Harry,” 24-anyos, na parehong residente kan Bacoor, Cavite.
Basado sa report nagpabakal suboot an mga suspek nin sarong pakete nin pigtutubudang shabu na may gabat na 100 gramos asin nagkakantidad nin P680,000 karibay kan P200,00 buy-bust money.
Durante kan operasyon, nahiling kan sarong operatiba an pagtapok kan suspek kan buy-bust money asin nakua an kadugangang siyam na pakete nin pigtutubudang shabu na may kabilogang 900 gramos asin may kantidad na P6,120,000.
Ginibo an nasabing operasyon sa pinagsarong operatiba kan Regional Police Drug Enforcement Drug Enforcement Unit 5 bilang lead unit, Legazpi City Police Station asin Philippine Drug Enforcement Agency Albay Provincial Office.
Sa kabilogan, nag-abot sa P6.8 milyon an kantidad kan mga nakumpiskar na ilegal na droga gikan sa mga suspek.
Nahahamapang an mga ini sa kasong pagbayolar sa Republic Act 9165 o ang Comprehensive Dangerous Drugs Act of 2002.
Mientrastanto, nasa kustodiya na kan Legazpi CPS an mga ebidensya asin mga naarestar na suspek para sa magkakanigong disposisyon.
Source: Bombo Radyo Legazpi