LEGAZPI CITY- Ipigkokunsiderar na manageable an pagtatapos kan voters registration kasuudma, Mayo 18, sa rehiyong Bicol.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na dinumog man liwat an saindang mga opisina alagad bako ini siring kan nakalihis na mga taon na haros inabot nin maagahon an pagproseso kan dokumento kan mga registrants.
Basado sa datos, nasa 19, 680 an naserbisyuhan kan ahensya sa huring aldaw kan pagpaparehistro.
Sa nasabing numero, pigkakarkulong nasa poco mas o menos 8,500 an mga nagpalipat kan saindang registro, nagpa tama kan saindang records asin iba pa.
Sinabi kan opisyal na sa laog nin anom na bulan na registration period, nasa poco mas o menos 300,000 an naserbisyuhan kan mga Comelec offices sa rehiyon.
Mientras tanto, nangapudan man si Valeza sa publiko na baguhon na an nakaugalian na saka sana mahiro kun huring aldaw na kan pagpaparehistro huli ta pigrani na suboot kan opisina sa mga eskwelahan asin mga komunidad an saindang serbisyo.
Source: Bombo Radyo Bicol