Pinuri ni Gobernador LRay Villafuerte si Pangulong Ferdinand “Bongbong” Marcos Jr. sa pagbibigay ng suporta sa mga lokal na pamahalaan (LGUs) sa pamamagitan ng pinalawak na Local Government Support Fund (LGSF) sa ilalim ng programang “Sa Bagong Pilipinas, Bawat Bayan Makikinabang.”
“Hindi lang niya kinikilala ang papel ng LGUs, binibigyan din niya tayo ng suporta upang mas mabilis at direktang maihatid ang serbisyo sa ating mga nasasakupan,” ani Villafuerte.
Noong Pebrero 23, iniutos ni Pangulong Marcos ang direktang paglilipat ng ₱57.8 bilyon LGSF, tumaas mula ₱23 bilyon noong 2025. Saklaw ng programa ang mga proyekto sa kalsada, ospital at health stations, tubig, kuryente, evacuation centers, at taunang pamamahagi ng bigas sa mga low-income na pamilya.
Binanggit ng gobernador na puro serbisyo ang layunin ng programa: “Walang politika, puro serbisyo lamang.” Pinuri rin niya ang pagkilala ng pangulo sa mga LGU bilang kaakibat sa pagpapaunlad ng bansa sa grassroots.
Source: PIA Bicol