Matagumpay na isinagawa ang programang “Linis Ligtas Barangay: Clean-Up Drive at Tree Planting Activity” noong Setyembre 2, 2025 sa bayan ng Mamburao, Occidental Mindoro. Layunin ng aktibidad na ito na mapangalagaan ang kalikasan, maisulong ang kalinisan, at maitaguyod ang kalusugan ng buong komunidad. Ang pagtatanim ng puno ay isinagawa sa Demo Farm sa Barangay Balansay, habang ang sabayang paglilinis naman ay isinagawa sa mga piling lugar tulad ng Barangay 2, Barangay 4, Barangay 5, at Barangay Tayamaan (Sitio Aroma).
Ang pagtatanim ng puno ay mahalagang hakbang sa pagpapanatili ng balanse ng kalikasan. Bukod sa pagbibigay ng malinis na hangin, nakatutulong ito upang maiwasan ang pagbaha, mapanatili ang lamig ng kapaligiran, at suportahan ang biodiversity. Samantala, ang clean-up drive ay nagsisilbing epektibong paraan upang mabawasan ang basura, maiwasan ang pagdami ng mga lamok at insekto na nagdadala ng mga sakit gaya ng dengue at leptospirosis, at mapanatili ang kaayusan sa mga barangay. Ang mga gawaing ito ay patunay na ang simpleng ambag ng bawat isa ay may malaking epekto sa kalusugan ng buong komunidad.
Ang aktibidad ay naisakatuparan sa tulong ng iba’t ibang sangay ng pamahalaan. Kabilang sa mga pangunahing katuwang ang Pamahalaang Panlalawigan ng Occidental Mindoro sa pamumuno ni Gov. Eduardo B. Gadiano at ang Lokal na Pamahalaan ng Mamburao sa pangunguna ni Mayor Atty. Glicerio S. Almero III. Lubos din ang suporta ng mga ahensya tulad ng DOH CHD MIMAROPA, PDOHO, Provincial at Municipal Health Offices, pati na ang mga tanggapan ng LGU Mamburao gaya ng MENRO at MDRRMO, na nagbigay ng kinakailangang tulong at koordinasyon.
Ang Linis Ligtas Barangay ay isang paalala na ang pangangalaga sa kalikasan ay hindi lamang responsibilidad ng iilan, kundi ng buong komunidad. Ang mga inisyatibang tulad nito ay dapat magsilbing inspirasyon upang ipagpatuloy natin ang pangangalaga sa ating kapaligiran araw-araw. Sa pamamagitan ng sama-samang pagkilos—mula sa simpleng pagtatanim, tamang pagtatapon ng basura, hanggang sa pangangalaga sa ating mga likas na yaman—tinitiyak natin ang mas ligtas, malusog, at maunlad na kinabukasan para sa ating mga anak at mga susunod na henerasyon.
Source: Provincial Health Office Occidental Mindoro