Sa ilalim ng masayang sikat ng araw at malamig na buhos ng tubig mula sa mga hose, timba, at sprinkler, muling isinabuhay ng bayan ng Taytay, Rizal ang makulay at masaganang SABATA Festival 2025, bilang bahagi ng taunang Kapistahan ni Patron San Juan Bautista.
Ang SABATA Santong Basaan sa Taytay ay hindi lamang isang tradisyon kundi isang makasaysayang selebrasyon ng pananampalataya, kultura, at komunidad.
Tampok sa pagdiriwang ngayong taon ang masiglang sayaw parangal na inihandog ng mga grupo para sa minamahal na patron.
Sa bawat indak at galaw ng kanilang mga paa, dala nila ang panalangin, pasasalamat, at pagbibigay-galang sa patron ng pagbibinyag.
Hindi rin nagpahuli ang masiglang basaan, na simbolo ng pagbabasbas at panibagong buhay. Mula sa mga lansangan ng Taytay ay maririnig ang tawanan, hiyawan, at musika bilang patunay ng pagkakaisa ng bawat Taytayeño sa tradisyong ito. Bata man o matanda, turista man o lokal, lahat ay may parte sa kasayahan.
Ang SABATA Festival ay patunay ng tibay ng pananampalataya at kultura ng Taytay. Isang araw ng saya, dasal, at buhos ng biyaya literal at espiritwal. Tunay na buhay na buhay ang diwa ng bayanihan at pagdiriwang sa puso ng bawat isa.