Bilang pagpapahiling nin maagap asin may pagkaherak na serbisyo sa panahon nin kalamidad asin krisis, dagos na nagmobilisa an Department of Social Welfare and Development (DSWD) Field Office V – Bicol Region kan saindang Angels in Red Vests tanganing maghatod nin asistensya sa mga pamilya kan tulong indibidwal na nagadan sa trahedya nin pagkalunod sa Sta. Magdalena, Sorsogon kan Nobyembre 4, 2026. An insidente nagresulta sa pagkagadan nin tulong katawo asin nagdara nin grabeng kamunduan sa saindang mga pamilya.

Kan Nobyembre 6, 2026, ininstruksyunan ni Regional Director Norman S. Laurio an Crisis Intervention Section (CIS) Irosin Satellite Office na dagos na magsagibo nin home visitation asin seguraduhon na makakarawat kan mga apektadong pamilya an kinakailangang asistensya. Sa isinagawang pagbisita, nagtao nin psychosocial support an mga social worker tanganing matabangan an mga pamilya na makaya an grabeng kamunduan, emosyonal na pag-antos, asin kasakitan na dulot kan pagkawala kan saindang mga namate.

Paagi sa Assistance to Individuals in Crisis Situations (AICS) Program, nagtao an DSWD Bicol nin kabuuang ₱75,000 na funeral assistance sa mga apektadong pamilya tanganing makatabang sa gastos sa pagpapalibing asin iba pang kaugnay na pangangaipo. Dugang pa digdi, pinoproseso man kan Field Office an dugang na Cash Relief Assistance tanganing matugunan an iba pang apuradong pangangaipo kan mga pamilya asin masigurong may suporta sinda para sa pang-araw-araw na pagkakan asin pamumuhay sa panahon kan saindang pagsubok.

An mga inisyatibong ini nagpapahiling kan padagos na paninindigan kan DSWD Bicol sa pagtao nin maagap, angay, asin may pagkaherak na serbisyong panlipunan sa mga indibidwal asin pamilyang nag-aatubang nin krisis. Ini man nakaayon sa mga direktiba ni DSWD Secretary Rex Gatchalian, alinsunod sa instruksyon ni President Ferdinand “Bongbong” Marcos Jr., na siguraduhon na an ayuda kan gobyerno makaabot sa mga mamamayang mas nangangailangan, partikular sa panahon nin kalamidad, trahedya, asin iba pang mabibigat na pagsubok.

Leave a Reply

Your email address will not be published. Required fields are marked *