Nagdistribwir nin 220 Family Food Packs (FFPs) an Department of Social Welfare and Development Field Office V – Bicol Region sa mga pamilyang naapektaran kan aktibidad kan Bulkang Mayon na temporaryong nag-eerok sa apat na evacuation center sa Tabaco City, Albay, kan Oktubre 31, 2026. An inisyatibong ini naglalayong magtao nin pagkaon asin suporta sa mga pamilyang napiritan na maghali sa saindang mga harong tanganing masiguro an saindang kaligtasan.
An mga food packs nakalaan para sa mga internally displaced persons (IDPs) hale sa mga barangay nin Magapo, Buang, Mariroc (Nagsipit), Oson, asin Buhian. Paagi sa distribusyon na ini, tinutugutan na matabangan an mga pamilya sa saindang pangangaipo sa pagkaon mantang sinda temporaryong nakaistar sa mga evacuation center dahil sa padagos na pagtaas kan alert status kan Bulkang Mayon sa Alert Level 3.
Binisita ni DSWD Bicol Regional Director Norman S. Laurio an mga evacuation center tanganing personal na masiguro na igwa nin igong ayuda asin komportable an kamugtakan kan mga evacuee. An pagbisita kabali sa padagos na pagmonitor kan ahensya sa mga pangangaipo kan mga pamilyang apektado, siring man sa pagtiyak na nakakaabot sa mga residente an kinakailangang suporta sa panahon kan krisis.
Sa paggigiya ni DSWD Secretary Rex Gatchalian, padagos na minomonitor kan ahensya an mga available na suplay asin standby funds na magagamit sa pagtugon sa mga pangangaipo kan mga IDP. Ini susog sa direktiba ni President Ferdinand R. Marcos Jr. na seguruhon an kapakanan asin kaligtasan kan mga pamilyang temporaryong nag-eerok sa mga evacuation center mantang naka-Alert Level 3 an Bulkang Mayon. An DSWD Bicol padagos na nakahanda na magtao nin kinakailangang tabang sa mga komunidad na apektado kan kalamidad.
Source: https://www.facebook.com/share/p/1SMmf9hghn/
Panulat ni: PCpl Doxie Charesse C Casasos