Binangga umano ng China Coast Guard (CCG) ang Bureau of Fisheries and Aquatic Resources (BFAR) vessel na BRP Datu Magat Salamat nitong Biyernes, Setyembre 18, sa baybayin ng Palawan habang naghahatid ito ng fuel assistance sa mga Pilipinong mangingisda sa West Philippine Sea.
Ayon sa Philippine Coast Guard (PCG), nagtamo ng pinsala sa starboard o kanang bahagi ng BFAR vessel ang nasabing banggaan.
Dahil sa insidente, nabaluktot, natanggal, at naalis sa puwesto ang mga railing, metal support, deck fixture, at iba pang kagamitan ng barko.
Nangyari ang banggaan isang araw lamang bago muling nakatakdang bumiyahe ang BRP Datu Magat Salamat matapos itong ma-ground sa Hasa-Hasa Shoal.
Nagsasagawa ng misyon ang BRP Datu Magat Salamat para sa fuel subsidy sa ilalim ng proyektong KBBM para sa mga lokal na mangingisda nang mangyari ang insidente.
Patuloy na binabantayan ng mga awtoridad ang kalagayan ng mga tripulante at ng sasakyang pandagat habang nakikipag-ugnayan sa mga kinauukulang ahensya para sa mga susunod na hakbang.