Ipigngalas ngunyan kan Samahang Industriya ng Agrikultura an paglangkaw kan presyo nin bagas sa mga merkado sa ibong na bastante pang suplay ini antes pa man magtama an mga kalamidad asin habagat sa nacion.
Segun ki SINAG Executive Director, Jayson Cainglet, sa intrevista kan Bombo Radyo Legazpi, dapat wara nin paglangkaw sa presyo kaini huli sa an gabos na lokal asin in-import na bagas an haloy nang nakaipon sa warehouse o igwa nin mga lumang stocks.
Posibleng rason suboot kan paglangkaw an huli sa warang nagmo-monitor kaini huli sa abala an gobierno sa Habagat, paghahanda sa El Niño na nagkakawsa man nin kadifisilan an mga konsomedores.
Segun saiya na antes pa man an mga kalamidad an mas hababa an farmgate price kan mga bagong ani na paroy na nasa P14 hasta P15 kumpara sa pigpapabakal na bagas na lagpas P50 kada kilo.
Mientrastanto, katakod kan nagpapadagos na deliberasyon sa badyet kan kada ahensya nin gobierno, nagmamawot an grupo na madugangang pa an pondo sa sektor kan agrikultura nganing madali makabawi sa posibleng huma kan El Niño asin maengganyar an local producers na magtanom asin mag-ataman nin hayop huli sa bako sana ini an orolay sa seguridad kundi nakataya kabuhayan kan namamanwaang Pilipino na naglalaom sa nasabing sektor.
Source: Bombo Radyo Bicol