LEGAZPI CITY—Tulos na nagkundusir nin clean up drive asin fogging an banwaan kan Camalig, Albay makalihis na makapagrehistro nin mga kaso nin dengue.
Basado sa pinakahuring datos kan Albay Provincial Health Office, nasa 67 kaso na an tinamaan nin dengue asin saro an binawian nin buhay sa nasabing banwaan.
Segun ki Camalig Mayor Caloy Baldo, sa intrevista kan Bombo Radyo Legazpi, nagsasagibo na sinda sa ngunyan nin clean up drive asin fogging sa mga barangay.
Afuera digdi, nakipag-olay na man an alkalde sa mga punong barangay mapadapit sa pagsugpo kan dengue asin pig-abisuhan na mag-report en kaso man na may suspected cases nganing maaaraman kun an pwedesir na mga gibohon.
Mensahe man kaini sa namamanwaan na tulos na nilinigan an posibleng pag-istaran nin mga lamok nganing malikayan an nasabing helang.
Mientras tanto, magigiromdomang nagsakat na sa 1,457 an nairehistrong kaso asin 11 an nai-report na binawian nin buhay huli kan dengue sa provincia kan Albay.
Source: Bombo Radyo Bicol