LEGAZPI CITY- Ikinaugma kan Albay Schools Division an anunsyo kan gobierno provincial kan Albay na pag konstruir nin dugang na 29 classrooms para sa provincia sa School Year 2026-2027.
Segun ki Albay Schools Division Office Spokesperson Froilan Tena sa intrevista kan Bombo Radyo Legazpi na dakula an pangangaipo kan provincia sa dugang na mga classrooms.
Pinaglalaoman na makakatabang ini para sa mga pag-accomodate kan mga estudyante.
Aminado kaya an opisyal na kun igwang kakulangan o raot na mga classrooms, paramientras na pigagamit an mga temporary learning shelter na bako komportable sa mga kaakian huli sa labing init asin maribok na kapalibutan.
Naglalaom man si Tena na madudugangan pa an 29 na mga classrooms ngani na maibitaran an pagsuksukan kan mga estudyante.
Napag-araman na sa pagbubukas kan panibagong school year, pinaglalaoman an nasa 300,000 na mga enrollees sa bilog na Albay.
Source: Bombo Radyo Legazpi