Nagkasararo an Department of Social Welfare and Development (DSWD) Field Office V asin an Technical Education and Skills Development Authority (TESDA) Regional Office V tanganing mapakusog an akses kan mga benepisyaryo kan Pantawid Pamilyang Pilipino Program (4Ps) sa teknikal asin bokasyonal na pagsasanay, sertipikasyon, asin mga oportunidad sa trabaho asin pangabuhian. Pormal na pinirmahan kan duwang ahensya an Memorandum of Agreement kan Oktubre 15, 2026, sa TESDA RO V Conference Room sa Rawis Government Center, Legazpi City. Segun ki DSWD Field Office V Regional Director Norman S. Laurio, mahalagang itugma an mga pangangaipo kan mga pamilya sa mga oportunidad na maitatanyag kan merkado nin trabaho asin lokal na ekonomiya.
Sa irarom kan kasunduan, an DSWD Bicol an matabang sa pagtukoy kan angay na mga programa asin interbensyon base sa pangangaipo asin abilidad kan mga benepisyaryo, mantang an TESDA an magtao nin giya manungod sa mga training program, kwalipikasyon, asin mga kahagadan kan industriya. Idiniin ni RD Laurio na an tagumpay kan partnership bako sanang nasusukat sa kadakul kan mga referral, nakatapos nin training, o naisyuhan nin sertipiko, kundi sa mga oportunidad na makukua kan mga benepisyaryo pagkatapos kan saindang pagsasanay.
Kaipuhan na an mga bagong abilidad magin tulay sa pagkakatrabaho, pagpoon nin negosyo, asin iba pang produktibong pangabuhian na makakatabang sa pagpaangat kan kamugtakan kan saindang mga pamilya.
Binigyang-diin man ni RD Laurio an kahalagahan kan padagos na koordinasyon, pagbinahinan nin impormasyon, asin pagmonitor kan mga programa tanganing masigurado na epektibo asin mayongong resulta an mga interbensyon. Nagtambong sa MOA signing si RD Laurio, kaiba an mga tauhan kan DSWD Field Office V, asin si TESDA Provincial Director Mariglo Macabuhay-Sese, kaiba an iba pang mga opisyal asin empleyado kan TESDA. Paagi sa pagtambayayong na ini, naglalaom an duwang ahensya na mas mapalawak an oportunidad kan mga benepisyaryo kan 4Ps na magkaigwa nin angay na abilidad, matatag na pangabuhian, asin mas marhay na kinabukasan para sa saindang mga pamilya.
Source: https://www.facebook.com/share/p/1CL6YpsV93/
Panulat ni: PCpl Doxie Charesse C Casasos