Padagos an esfuersos kan sarong Community Pantry Organizer sa Tabaco City, Albay ngani na makatabang sa mga vulnerable sectors na pinaka apektado kan presenteng krisis.
Segun ki Sheryl Brobio sa intrevista kan Bombo Radyo Legazpi na piglalatag an nasabing pantry tuyong aldaw nin Sabado.
Duwang semana na pigigibo an programa asin target na maipagpadagos pa ngani na makatabang sa mga apektado kan krisis sa petrolyo.
Kaibanan sa mga enot na nabenepisyuhan nin libreng bagas, gulay, asin iba pa an mga tricycle drivers, padyak drivers, construction workers asin target man an mga jeepney drivers sa masunod na Sabado.
Pag-istorya ni Brobio na hali sa personal niyang sweldo an pigagamit sa pagtabang.
Bilang solo provider sa saiyang pamilya, kinakaipuhan suboot niya na magdugang nin kliyente sa trabaho ngani na dae man maapektaran an budget kan saiyang pamilya.
Paliwanag kaini na aram niya an pagmati na warang mapagkukuwaan nin pangangaipo kaya bukas siyang magtabang hasta sa makakaya niya.
Source: Bombo Radyo Legazpi