Hiniling ng Sangguniang Panlalawigan (SP) ng Oriental Mindoro sa Maritime Industry Authority (MARINA) na pansamantalang suspendihin ang advisory na nagpapahintulot sa mga shipping operator na magtaas ng pamasahe ng hanggang 20 porsiyento sa rutang Batangas–Calapan.
Ayon sa SP, dapat munang magsagawa ng public consultation at masusing review bago ipatupad ang anumang fare increase, lalo na’t maaaring maapektuhan ang mga pasahero, negosyo at transportasyon ng mga produkto.
Sinabi ni Vice Governor at SP Presiding Officer Antonio Perez Jr. na nauunawaan ng pamahalaang panlalawigan ang mga hamon na kinakaharap ng industriya ng shipping, ngunit mahalaga ring mapanatiling abot-kaya ang transportasyon para sa publiko.
Ang rutang Batangas–Calapan ay isa sa pinakamahalagang daluyan ng biyahe at kalakalan para sa libu-libong residente at negosyo sa lalawigan.
Inanyayahan din ng SP ang mga opisyal ng MARINA na dumalo sa Committee en banc hearing sa Marso 17, 2026 upang talakayin ang isyu.
Source: Inquirer.net