Nasa 900 na residente mula sa mga munisipyo ng Rizal at Bataraza sa Palawan ang napagkalooban ng libreng serbisyong pangkalusugan sa ilalim ng Integrated Immunization Campaign ng Provincial Health Office (PHO) ng Pamahalaang Panlalawigan ng Palawan nitong Hulyo 29, 2024.
Katuwang sa aktibidad ang Center for Health Development-MIMAROPA, Philippine Information Agency (PIA), Provincial Department of Health Office (PDOHO) Palawan, Relief International, Palawan Ultra Health Marketing Inc., at LGU Rizal.
Ilan sa mga serbisyong ipinagkaloob ay medical consultation, laboratory at vaccination services, Human Immunodeficiency Virus o HIV screening, Malaria Testing and Long-Lasting Insecticidal Nets (LLIN) distribution, Tuberculosis (TB) / Leprosy and animal bite treatment, family health at nutrition services.
Namahagi rin ng Buntis Kits, mga bitamina at nagsagawa ng Information Education and Communication (IEC) Campaign at puppet show katuwang ang mga kapulisan ng Palawan sa pagpapanatili ng kaayusan sa naturang aktibidad.
Layunin ng aktibidad na mailapit ang libreng serbisyong medikal sa mga mamamayan gayon din upang mapataas ang kamalayan at mahikayat ang mga mamamayan na magpabakuna upang maiwasan ang mga vaccine-preventable diseases kabilang ang tuberculosis, poliomyelitis, diphtheria, tetanus, pertussis at measles.
Source: Palawan PIO