Sinierto kan Schools Division Office Albay na padagos na pigpapangatamanan an salud asin kapakanan kan mga estudyante asin mga paratukdo sa tahaw kan El Niño.
Segun ki SDO Albay Spokesperson Froilan Tena sa intrevista kan Bombo Radyo Legazpi na nagsusunod an ahensya sa Executive Order 30 o an three-tier framework para sa pagsuspinde asin pagbabalik kan face-to-face classes.
Napag-araman na igwa na man na mga eskwelahan na nag-adjust nin oras nin klase pasiring sa alas-6 nin aga ngani na dae na maabutan nin matinding init kan panahon tuyong udto.
Alagad amibado an opisyal na sa mga eskwelahan na nasa upland barangays, nagtetenir na regular an klase kan mga ini huli ta makahoy pa man asin nagtetenir na presko an palibot.
Segun kan opisyal na pinaka prinsipyo sana kan EO 130 na masierto an kaligtasan asin salud kan mga jovenes asin mga school personnel.
Sa ibong kan suspensyon kan in-person classes, tinawan duon kan opisyal na nagpapadagos an pagkanuod kan mga estudyante huli sa pigpapaotob na mga flexible learning arrangement.
Mientras tanto, sa presente sinabi kan opisyal na wara man na naresibeng reklamo o report dapit sa ventilation sa mga classrooms sa provincia, afuera na sana kun nagkakaigwa nin power interruption.
Source: Bombo Radyo Bicol