Pinakusog kan Lokal na Gobyerno kan Cateel an pagbiyahe asin pagserbi paagi sa pagdonar nin sarong Bajaj Maxima Cargo na magagamit kan mga myembro kan Revitalized-Pulis sa Barangay (R-PSB) Cluster 4 sa Cateel, Davao Oriental.
An nasambitan na sasakyan nag-trending sa social media, kun sain nagkaigwa nin magkakaibang reaksyon an mga netizen. An iba nagkatawa, mantang an iba nag-isip na bako ini makakatabang. Pero para sa mga residente kan harayong mga lugar, dakula na ining tabang, labi na sa mga pulis na an sadiring katuyuhan asin pangngayo sana iyo an maglingkod sa katawuhan.
Sa presente, ginagamit na kan R-PSB Cluster 4 an nasambitan na sasakyan na may logo kan kapulisan tanganing mas marhay na makapaglingkod sa mga residente kan lugar. Dakula ining tabang huli ta kaya kaining makasulod sa mga harayong lugar asin makapagdara kan mga produkto kan mga paraoma, labi na sa mga dalan sa kabukiran na an mga kalabaw asin baka sana an nakakaya na makaagi.
An nasambitan na sasakyan bako na binakal kan Philippine National Police (PNP), kundi sarong donasyon na bukal sa puso na itinao kan Municipal Government of Cateel sa pamayo ni Mayor Emilou C. Nuñez, tanganing mas mapauswag asin mapadali an pagtao nin serbisyo asin paglingkod sa mga residente.
An Police Regional Office 11, sa pamayo ni PBGEN Benigno L. Guzman, Acting Director, nagpahayag nin dakulang pasasalamat asin paggalang sa LGU kan Cateel.
Ini sarong patunay na an PNP asin LGU nagtatarabangan tanganing maitao an tama asin marhay na serbisyo publiko para sa katawuhan, asin tanganing makamtan an kauswagan kan satuyang inang banwaan.