LEGAZPI CITY—Antes pa man magdeklara nin state of calamity an provincia kan Albay huli sa naglalangkaw na kaso kan dengue asin mga nairehistrong nagagadan kan helang, nagpaluwas na nin advisories an Department of Education Albay sa guidelines mapadapit sa mga lakdang kontra dengue.
Segun ki DepEd Albay Disaster Risk Reduction and Management Service Officer Christopher San Diego, sa intrevista kan Bombo Radyo Legazpi, kabale sa saindang mga estratehiya an 4-S strategies o an Search and Destroy, Self-protection, Seek early consultation, asin Support fogging/spraying.
Afuera digdi, pig-mobilize an saindang resources nganing makatabang kun ano an kinakaipuhan na suporta kan mga eskwelahan.
Dugang pa kan opisyal na sa presente an may naidentipikar na sinda na mga eskwelahan na pwedesir potensyal na nasa risk factor kan helang alagad minimal o haros warang significant sa numero kan kaso na nairehistro sa provincial.
Sa presente, nakikipagkoordinar na man an saindang opisina sa central office nganing maghagad nin suporta en kaso may mag-report sa mga eskwelahan na nangangaipuhan nin pondo o an Clean-Up and Clearing Operations funds para sa nasabing mga lakdang.
Source: Bombo Radyo Bicol