CALABARZON — Patuloy na lumalaki ang demand sa ube hindi lamang sa Pilipinas kundi maging sa pandaigdigang merkado, kaya pinalalakas ng Department of Agriculture–Agricultural Training Institute (DA-ATI) CALABARZON ang mga programa para sa produksyon at pagproseso nito.
Ayon kay DA-ATI CALABARZON Center Director Dr. Rolando Maningas, malaking oportunidad ang lumalaking interes sa ube para sa mga magsasaka at agripreneur na magpahusay at mag-innovate sa produksyon.
Humigit-kumulang 13 porsyento ng pambansang produksyon ng ube ay nagmumula sa CALABARZON. Gayunman, nananatiling hamon ang kakulangan sa de-kalidad na planting materials, research facilities, financing, market linkages, at standards.
Bilang tugon, nagsasagawa ang DA-ATI CALABARZON ng mga training at lakbay-aral, kabilang ang pagsasanay sa BeeGood Agriventures OPC sa Tiaong, Quezon. Layunin nitong professionalize ang ube production, palakasin ang kaalaman at kasanayan ng mga agricultural professionals at magsasaka, at higit pang mapaunlad ang ube value chain sa rehiyon.
“Patuloy nating pagtutulungan ang pagpapalakas ng industriya ng ube sa pamamagitan ng inobasyon, pakikipagtulungan, pagbabahagi ng kaalaman, at pagpapanday ng kasanayan,” ani Maningas.
Source: PIA CALABARZON