CALAPAN CITY, Oriental Mindoro — Muling bibigyang-pansin sa pambansang entablado ang Palatak Palay Seeder, isang makabagong kagamitang pang-agrikultura mula sa Oriental Mindoro, matapos itong kilalaning 2025 Presidential Filipinnovator Awardee.
Tatakbo ang pagpapakita ng imbensyon sa Sustainability Solutions Exchange (SSX) 2026 mula Mayo 21 hanggang 23 sa World Trade Center Metro Manila sa Pasay City, kasabay ng IFEX Philippines 2026.
Binuo nina Engr. Delfin Cuevas Jr. at Farmwell Agricultural Machinery Manufacturing ng bayan ng Bongabong, layunin ng Palatak Palay Seeder na mapabilis ang pagtatanim ng palay, mabawasan ang gastos sa paggawa, at maiwasan ang aksaya sa binhi.
Ayon sa pagsusuri ng Department of Science and Technology (DOST), nakapagtala ang teknolohiya ng 89.09 porsiyentong kahusayan sa pagtatanim gamit ang 3D-printed PETG material at stainless steel components.
Suportado ng DOST-MIMAROPA ang paglinang at pagpapalawak ng imbensyon bilang bahagi ng pagsusulong ng makabagong teknolohiya para sa mga magsasakang Pilipino.
Source: PIA MIMAROPA