Lungsod ng Tagaytay, Pebrero 5 — Pormal na pinagtibay ng Office of Civil Defense (OCD) CALABARZON at ng Pamahalaang Lungsod ng Tagaytay ang kanilang ugnayan sa paghahanda at pagtugon sa kalamidad sa pamamagitan ng paglagda ng isang Memorandum of Agreement (MOA) ngayong araw.
Nilagdaan ang kasunduan nina OCD CALABARZON Regional Director Carlos Eduardo E. Alvarez III at Tagaytay City Mayor Aizack Brent D. Tolentino, na nagtalaga sa Lungsod ng Tagaytay bilang ikapitong local government unit (LGU) sa rehiyon ng CALABARZON na magsisilbing strategic hub para sa disaster response.
Sa ilalim ng kasunduan, magsisilbing mahalagang sentro ang Tagaytay City sa pagpapahusay ng logistics, resource mobilization, at koordinasyon ng mga ahensya tuwing may kalamidad. Kabilang dito ang prepositioning ng relief goods at mga kagamitang pang-emerhensiya upang mas mapabilis at maging episyente ang pagtugon sa mga apektadong lugar sa loob at labas ng lungsod.
Patuloy ang pakikipag-ugnayan ng OCD CALABARZON sa mga lokal na pamahalaan upang magtatag ng mga strategic hub na magpapalakas sa kahandaan sa sakuna, magtitiyak ng agarang tulong, at magpapababa sa epekto ng mga natural at gawa ng tao na panganib.
Ang paglagda ng MOA ay patunay ng matibay na pagtutulungan ng OCD CALABARZON at ng Pamahalaang Lungsod ng Tagaytay sa layuning mapangalagaan ang buhay, maprotektahan ang mga komunidad, at mapalakas ang katatagan laban sa mga sakuna.
Source: https://www.facebook.com/piagovph4a/posts/pfbid028aQiszv4xsM2ixP8QpTDeqEhUYZb1fL6xPYoSMj5cKGMMXtmgnr9D527vu7fhZxzl