Sa bayan ng Kawit, Cavite, matatagpuan ang makasaysayang Aguinaldo Shrine at Museum, ang tahanan ng unang Pangulo ng Pilipinas na si Heneral Emilio Aguinaldo.
Sa balkonahe ng bahay na ito unang iwagayway ang bandila ng Pilipinas at unang tinugtog ang Lupang Hinirang noong Hunyo 12, 1898, bilang tanda ng kasarinlan ng bansa mula sa pananakop ng Espanya.
Itinayo noong 1845, ang bahay na ito ay yari sa matitibay na kahoy at bato, at kilala sa kakaibang disenyong Pilipino Espanyol.
Ipinagawa ito ni Heneral Aguinaldo hindi lamang bilang tahanan, kundi bilang kanlungan ng rebolusyonaryong kilusan.
Makikita sa loob ng museo ang mga antigong kasangkapan, sandata, kasuotan, at dokumento na ginamit noong panahon ng rebolusyon.
Sa kasalukuyan, ang Aguinaldo Shrine ay pinangangasiwaan ng National Historical Commission of the Philippines (NHCP).
Dito rin taunang ginaganap ang pambansang pagdiriwang ng Araw ng Kalayaan, kung saan nagtitipon ang mga opisyal ng pamahalaan, mag-aaral, at mamamayan upang gunitain ang kabayanihan ng mga rebolusyonaryo.
Bukod sa kasaysayan, tampok din sa lugar ang Aguinaldo Park, na nagsisilbing pahingahan at pasyalan ng mga bisita.
Sa bawat pagbisita sa dambanang ito, muling nabubuhay ang diwa ng kalayaan, kabayanihan, at pagmamahal sa bayan na siyang pinaglaban ng ating mga ninuno.
Ang Aguinaldo Shrine at Museum ay nananatiling buhay na saksi sa mahigit isang siglong kasaysayan ng Pilipinas, isang paalala na ang kalayaan na tinatamasa natin ngayon ay bunga ng dugo at sakripisyo ng mga tunay na bayani.