Ipinamalas ng isang off-duty police officer ang kanyang tapang, pagiging alerto, at malasakit sa publiko nang tumugon sa isang road crash incident at tumulong sa pagdakip sa suspek na tumakas sa Antipolo City.
Kinilala ng Police Regional Office 4A si Police Executive Master Sergeant (PEMS) Andy M. Evangelista ng Antipolo City Community Police Station dahil sa kanyang mabilis at maagap na pagtugon sa insidente noong Agosto 17, 2026.
Bagama’t wala sa kanyang regular na duty, hindi nag-atubili si PEMS Evangelista na kumilos nang makita ang nangyaring road crash. Agad niyang hinabol ang suspek na tumakas mula sa lugar at tumulong upang ito ay maaresto.
Ang kanyang naging aksyon ay nagpapakita na ang tungkulin ng isang pulis ay hindi lamang nakikita habang suot ang uniporme o nasa oras ng duty. Higit sa lahat, ipinamalas niya ang tunay na diwa ng pagiging lingkod-bayan—ang kahandaang tumulong at kumilos para sa kaligtasan ng komunidad.
Binigyang-pugay ng PRO 4A, sa pangunguna ni PBGen Dominic L. Baccay, Acting Regional Director, ang dedikasyon at katapangan ni PEMS Evangelista.
Ayon sa PRO 4A, ang kanyang ginawa ay sumasalamin sa B.E.S.T. Policing Framework, partikular sa prinsipyo ng “Be Visible” at “Engage Immediately,” na nagbibigay-diin sa pagiging present, alerto, at maagap sa pagtugon sa pangangailangan ng publiko.
Ang insidente ay nagsisilbing paalala na ang tunay na serbisyo ay hindi nasusukat sa oras ng duty. Sa pamamagitan ng kanyang mabilis na pagkilos, naging halimbawa si PEMS Evangelista ng isang pulis na handang tumulong at ipatupad ang batas kahit wala sa regular na oras ng serbisyo.