Umabot sa sobra P17 milyon an kabuuang halaga kan mga proyekto asin interbensyon na ipinamahagi kan Department of Agriculture-Bicol sa pagselebrar kan Handog ng Pangulo: Serbisyong Sapat para sa Lahat noong ika-14 kan Setyembre sa bilog na Bicol.
Sa sabayang Kadiwa ng Pangulo, nagin tampok an preskong asin abot-kayang produktong agrikultural hale sa mga parauma. Umabot man sa 900 bags kan NFA rice an nabenta sa Benteng Bigas, na nakinabang an 4,500 miembro kan vulnerable sectors sa rehiyon.
Namahagi man an DA-Bicol nin P2,325 cash assistance sa 755 na parauma nin high-value crops asin niyog, na may kabuuang P1.75 milyon sa inisyal na distribusyon.
Magpapadagos an programa sa mga masunod na aldaw para sa target na 35,552 parauma nin high-value crops, niyog asin palay na may sobra 2 ektarya na sinasaka—patunay kan padagos na suporta para sa mga parauma kan Bicol.