SAN JOSE, Occidental Mindoro (PIA) — Nagkaloob ang Department of Social Welfare and Development (DSWD) ng ayudang pinansyal sa 130 delivery rider sa Occidental Mindoro upang makatulong sa pagharap sa patuloy na pagtaas ng presyo ng gasolina at iba pang pangunahing bilihin.
Ayon kay DSWD Occidental Mindoro Social Welfare and Development (SWAD) Team Leader Shiela Sarabia, isinagawa ang pamamahagi ng ayuda noong Mayo 29 para sa mga benepisyaryo mula sa sektor ng Private Express and Messengerial Delivery Service sa tatlong pangunahing bayan sa lalawigan.
Bawat kwalipikadong delivery rider ay tumanggap ng tig-P5,000 na cash assistance.
Sinabi ni Sarabia na layunin ng programa na matulungan ang mga delivery rider na patuloy na nagbibigay ng mahalagang serbisyo sa kabila ng epekto ng inflation at mataas na presyo ng gasolina.
“Malaking tulong ito para sa kanila dahil kabilang sila sa mga apektado ng pagtaas ng presyo ng mga bilihin at lalo na ng gasolina,” ani Sarabia.
Ayon sa DSWD Occidental Mindoro, kabilang sa mga benepisyaryo ang mga rider mula sa 10 delivery company na nagpapatakbo sa lalawigan gaya ng AIMS Corporate Resources Inc., Asia-Now Enterprise Inc., Cloudpanda PH Inc., Combined Movers Inc., at LBC Express Inc., at iba pa.
Upang maging mas madali ang distribusyon ng ayuda, nagtalaga ang DSWD ng mga payout center sa mga bayan ng Mamburao, San Jose, at Sablayan.
Kabuuang 38 benepisyaryo mula sa Abra de Ilog, Mamburao, Paluan, at Sta. Cruz ang tumanggap ng ayuda sa DSWD Extension Office sa loob ng Provincial Capitol Compound sa Mamburao. Samantala, 52 benepisyaryo mula sa San Jose, Calintaan, Magsaysay, at Rizal ang kumuha ng kanilang cash aid sa Covered Court sa Barangay 8, Poblacion, San Jose, habang 40 rider naman ang nabigyan ng tulong sa Municipal Social Welfare and Development Office sa Sablayan.
Sa orihinal na talaan, 143 delivery rider ang nakatakdang makatanggap ng ayuda, subalit 130 lamang ang nakapasa sa isinagawang validation. Ilan sa mga hindi nakatanggap ay naunang nakinabang na sa programa para sa mga tricycle driver, habang ang iba naman ay may paso nang driver’s license.
Bahagi ang programang ito ng direktiba ni Pangulong Ferdinand R. Marcos Jr. na magbigay ng suportang pinansyal sa mga sektor na labis na naaapektuhan ng pagtaas ng presyo ng gasolina at inflation, partikular ang mga manggagawang nakadepende sa araw-araw na transportasyon at delivery services para sa kanilang kabuhayan.
Source: PIA MIMAROPA-Occidental Mindoro