Patuloy na lumalawak ang internet connectivity sa rehiyong MIMAROPA, kung saan 63 porsyento ng mga residente ay itinuturing nang internet users, ayon sa datos na binanggit mula sa Philippine Statistics Authority (PSA). Ayon kay DICT MIMAROPA Regional Director Emmy Lou V. Delfin ng Department of Information and Communications Technology (DICT), bagama’t patuloy ang pag-unlad ng digital access sa Mindoro, Marinduque, Romblon, at Palawan, nananatili pa rin ang mga hamon sa mga geographically isolated and disadvantaged areas (GIDAs).
Upang matugunan ang mga kakulangang ito, pinaigting ng DICT ang pagpapatupad ng Free WiFi for All program na nagbibigay ng libreng internet sa mga pampublikong lugar tulad ng mga paaralan, plaza, at pamilihan. Target ng ahensya na makapagtayo ng halos 400 bagong free Wi-Fi sites ngayong taon, na magdadala sa kabuuang bilang sa rehiyon sa tinatayang 900 sites, kabilang ang mga bagong lokasyon at mga dating hindi aktibong site na muling bubuhayin.
Ipinaliwanag ni Delfin na may ilang site na hindi nakapag-renew ng service contracts noong mga nakaraang taon, ngunit tiniyak niyang isasama ang mga ito sa implementasyon ngayong taon. Binigyang-diin din niya na bagama’t malaki na ang naging progreso, layunin pa rin ng DICT na makamit ang 100 porsyentong internet coverage sa MIMAROPA upang matiyak na maging ang mga komunidad sa malalayong lugar ay magkakaroon ng maaasahan at abot-kayang koneksyon sa internet.
Source: PIA MIMAROPA