Maysa a trailer truck a nakargaan iti sako-sako a bagas ti timmagilid idiay Maharlika Highway, Brgy. Nagsabaran, alas-6:30 iti rabii idi Pebrero 26, 2026. Dagiti kameng ti Diadi Municipal Police Station ken Bureau of Fire Protection Diadi ket dagus a rimmuar tapno sumango iti insidente ken mangipaay iti umuna a tulong.
Segun iti imbestigasyon ti pulisya, ti trailer truck ket naggapu idiay Isabela ken agturong koma iti probinsya ti Nueva Vizcaya idi nakapadas iti mechanical malfunction. Gapuna iti teknikal a diperensya, saan a nakontol ti lugan idiay pa-ngato ken pakurbada a paset ti dalan, isu a nagresulta iti panagtilid daytoy.
Bunga ti insidente, nagwaras ti lana ti lugan iti kalsada a nangipabannog iti panagdaliasat dagiti motorista. Pansamantala a naisardeng ti dua a linya ti dalan a nangrugi iti pannakaaramid ti traffic buildup iti lugar. Dagiti kapulisan ket nangipangulo iti traffic management ken safety measures tapno masigurado ti talged dagiti agdaldaliasat ken maliklikan ti ad-adu pay a posible a aksidente.
Tinulongan met dagiti bombero ti pannakaisagana ti flashing lights ken pannakalinis ti oil spill, bayat nga inted met ti Department of Public Works and Highways ti wrecker a nausar iti clearing operations.
Iti agdama, nalukatanen ti dua a linya ti kalsada. Pinalagip ti pulisya iti publiko a suroten dagiti traffic advisory tapno masiguro ti natalged ken naurnos a panagdaliasat.
Source: XFM Santiago