Muling tiniyak ng Philippine Ports Authority (PPA) ang patuloy nitong pagpapaunlad sa Abra de Ilog Port upang higit pang mapalakas ang kaligtasan sa paglalayag at mapabuti ang daloy ng mga pasahero at kargamento sa pagitan ng Occidental Mindoro at mainland Luzon. Ayon kay Guerrero Miranda, Acting Division Manager ng PPA Terminal Management Office sa Abra de Ilog, bahagi ito ng pangmatagalang plano upang gawing mas matatag at episyente ang operasyon ng pantalan.
Kabilang sa mga natapos na proyekto ang 200-meter breakwater na nagkakahalaga ng P500 milyon at natapos noong 2023. Malaki ang naitulong nito sa pagbawas ng epekto ng malalakas na alon lalo na tuwing panahon ng amihan, kung kailan madalas makaranas ng maalon na karagatan at kanselasyon ng biyahe ang mga barkong bumibiyahe sa pagitan ng Abra de Ilog at Batangas. Gayunman, isinasalang-alang pa ang pagpapalawig ng breakwater upang higit pang maprotektahan ang mga sasakyang pandagat sa kasagsagan ng monsoon season.
Upang matugunan ang pagsisikip ng mga sasakyan sa loob ng pantalan, nagsagawa rin ang PPA ng reclamation project na nagsisilbing pansamantalang holding area para sa outbound vehicles. Nakatulong ito upang mas maayos na mapamahalaan ang daloy ng trapiko kahit sabay-sabay ang operasyon ng iba’t ibang shipping lines. Samantala, nananatiling hamon ang limitadong docking capacity dahil sumasailalim sa maintenance ang docking areas 2 at 4, habang mas pinipili ang docking area 1 tuwing may masamang panahon para sa mas ligtas na pagmamaniobra.
Hindi pa ganap na nagagamit ang bagong passenger terminal dahil hinihintay pa ang instalasyon ng three-phase electrical system nito at pansamantalang nakakonekta sa suplay ng kuryente ng lumang terminal. Sa kabila nito, binigyang-diin ng PPA na ang lahat ng panukalang pagpapabuti ay naisumite na sa central office at bahagi ng tuloy-tuloy na development program ng ahensya upang higit pang patatagin ang Abra de Ilog Port bilang isang ligtas, maaasahan, at episyenteng daungan para sa mga manlalakbay at kalakalan sa Occidental Mindoro.
Source: PIA Occidental Mindoro