PAETE, Laguna — Inaanyayahan ng lokal na pamahalaan ng Paete, Laguna ang publiko na bisitahin ang bayan ngayong Semana Santa upang maranasan ang natatanging pagsasanib ng sining, pananampalataya, at tradisyon na matagal nang ipinagmamalaki ng mga Paeteño.
Kilala bilang “Carving Capital of the Philippines,” tampok sa Paete ang mayamang sining ng pag-uukit at paggawa ng taka o papier-mâché. Sa iba’t ibang bahagi ng bayan, makikita ang maliliit hanggang sa malalaking imahen ng mga religious icons na likha ng mga lokal na artisan—mga obrang sumasalamin sa malalim na debosyon at paniniwala ng komunidad.
Sa paggunita ng Semana Santa, nagiging mas makahulugan ang pagbisita sa Paete dahil sa mga likhang sining na nagsisilbing paalala sa buhay at pananampalatayang Kristiyano. Ang bawat ukit at taka ay hindi lamang produkto ng husay sa sining kundi simbolo rin ng patuloy na pamana ng kultura at tradisyon na ipinapasa sa bawat henerasyon.
Sa kabila ng modernisasyon, nananatiling buhay ang sining ng Paete—patunay na ang sining at pananampalataya ay patuloy na magkaugnay sa puso ng bawat Pilipino. Inaanyayahan ang lahat na tuklasin at suportahan ang lokal na sining habang ginugunita ang mahalagang panahon ng Semana Santa.
Source: PIA CALABARZON