Inilunsad ng ilang national government agencies ang Kadiwa ng Bagong Bayaning Mangingisda (KBBM) Program sa Buliluyan Port, Barangay Buliluyan, Bataraza, Palawan nito lamang ika-4 ng Hunyo 2025.
Ito ay inisyatibo ng Philippine Coast Guard (PCG) sa pagtutulungan ng Department of Agriculture (DA), Bureau of Fisheries and Aquatic Resources (BFAR), National Youth, Commission (NYC), at Local Government Units (LGUs) ng lalawigan.
Dumalo sa KBBM launching ang mga kinatawan ng iba’t ibang ahensya ng pamahalaan upang magpakita ng suporta sa sektor ng pangisdaan sina Admiral Ronnie Gil Gavan, Commandant, Philippine Coast Guard (PCG); Commodore Jay Tarriela, Spokesperson ng National Task Force for the West Philippine Sea (NTF-WPS); Commodore Weniel Azcuna, Commander, Coast Guard District- Palawan; Atty. Genevieve Guevarra, Assistant Secretary, Department of Agriculture; Director Elizer Salilig, MFT, National Director, Bureau of Fisheries and Aquatic Resources (BFAR); at Assistant Secretary Karl Josef Legazpi, Commissioner-at-Large, National Youth Commission (NYC).
Naroroon din sina OIC Regional Director Roberto R. Abrera ng BFAR MIMAROPA, Richchristopher Magbanua na kumatawan kina 2nd District Cong. Jose Alvarez at Palawan Governor-elect Amy Alvarez, at ang sektor ng pangisdaan sa pangunguna ni Mr. Elmer Ngujo II, Pangulo ng Palawan Owners and Fishermen Association.
Kasabay ng aktibidad, nakatakda ring isagawa sa pangunguna ng PCG at BFAR ang strategic Fishing Aggregate Device (FAD)/Payao Laying Operation sa Hasa-Hasa Shoal, Kanduli Shoa, at Rozul Reef sa West Philippine Sea ngayong araw.
Layunin ng paglulunsad ng KBBM sa Palawan ang palakasin ang kabuhayan ng mga mangingisdang Palaweño na pumapalot sa West Philippine Sea (WPS) at maibenta ang mga huli nilang isda diretso sa pamilihan, nang matiyak din ang abot-kayang presyo ng isda para sa bawat pamilyang Pilipino.
Source: The Palawan News