LEGAZPI CITY-Ma-deploy nin mga kapulisan an Legazpi City Police Station sa Cabagnan High School ngani mantiniron an seguridad asin kaligtasan, kasunod kan nangyaring riot kun sain imbuelto an nagkapirang menor de edad na estudyante.
Segun kay Legazpi City Police Station Chief of Police Police Lieutenant Colonel Arthur Tagtag Jr., sa intrevista kan Bombo Radyo Legazpi na nakikipag-koordinar na sinda sa eskwelahan asin na-identipikar na ninda an mga imbueltong menor de edad asin nagkaigwa na nin interbensyon kaiba an mga magurang kaini.
Kinaolay ninda ini mapadapit sa insidente asin napag-araman basado sa imbestigasyon na “trip” sana ninda ini.
Sa presente, nakikipag-koordinar na sinda sa City Social Welfare and Development (CSWD) para sa proper intervention sa mga jovenes.
Nag-request naman sinda nin police presence asin visibility sa eskwelahan orog na tuyong ralaogan kan klase asin sa pagluwas kaini, poon aga, udto, sagkod hapon.
Abiso man ni Tagtag sa mga magurang na i-closely monitor an saindang mga aki.
Pigsasagibo ninda ini bilang direktiba kan head quaters manungod sa nangyaring insidente sa Tacloban City.
Nakikipag-koordinar na man sinda sa mga security guards orog na sa mga pribadong eskwelahan na i-check an bag kan mga estudyante ngani dai makalaog an anumang kontrabando.
Katakod pa kaini, magsasagibo man sinda nin awareness program sa mga eskwelahan manungod sa lectures sa anti-bullying asin iba pang kadahasan.
Source: Bombo Radyo Bicol