Muling nanawagan ang Department of Health (DOH), sa pamamagitan ng Philippine Multisectoral Nutrition Project (PMNP), para sa isang mas sistemiko at multisektoral na paglapit sa pagtugon sa malnutrisyon. Ito ay binigyang-diin sa ginanap na Regional Local Government Unit (LGU) Mobilization and Technical Assistance Team Meeting and Coordination sa Calamba City mula Pebrero 18 hanggang 20, 2026.
Pinagtipon ng aktibidad ang mga kinatawan mula sa mga pambansang ahensya ng pamahalaan, local government units, at civil society organizations upang pagtibayin ang koordinasyon at pag-isahin ang mga estratehiya sa paglaban sa malnutrisyon, partikular sa Quezon Province. Layunin nitong palakasin ang ugnayan ng iba’t ibang sektor upang maging mas epektibo ang pagpapatupad ng mga programang pangnutrisyon sa lokal na antas.
Binigyang-diin ng PMNP na ang malnutrisyon ay isang komplikadong suliranin na nangangailangan ng sama-samang pagkilos mula sa sektor ng kalusugan, agrikultura, edukasyon, panlipunang kapakanan, at lokal na pamamahala. Sa pamamagitan ng pinaigting na supervision, mentoring, at capacity-building initiatives, layunin ng proyekto na mapalakas ang kakayahan ng mga LGU sa pagpaplano, pagpapatupad, at pagsubaybay ng kanilang mga programa.
Sa patuloy na pagbibigay ng teknikal na suporta at pagpapalakas ng mga sistema ng pamamahala, muling pinagtitibay ng DOH at ng mga katuwang nito ang kanilang pangakong wakasan ang malnutrisyon. Sa pamamagitan ng isang whole-of-government at whole-of-society approach, hangad ng PMNP na makamit ang mas malusog na kinabukasan para sa mga batang Pilipino at kanilang mga pamilya.
Source: PIA CALABARZON