LEGAZPI CITY- Nagkaigwa na nin pag-oolay an manhamiento kan Albay Electric Cooperative asin lokal na gobierno kan Legazpi City para sa pagpapaotob kan P300 na one-time electric bill subsidy para sa mga Legazpeño.
Marurumduman na pinaglalaoman na dakulang tabang an nasabing subsidiya ngani na mabawasan an bulanan na konsumo sa mga rehistradong residential meters sa ciudad.
Segun ki Albay Electric Cooperative Spokesperson Anj Galero sa intrevista kan Bombo Radyo Legazpi na pigkakarkulong labi sa 40,000 na mga residential power consumers sa Legazpi City an makikinabang sa sistensya huli ta direktang babawasan nin P300 an saindang electric bill para sa bulan nin Abril.
Sa presente pinaghahalat na sana na makapagpasar nin ordinansa an lokal na gobierno asin makapagpirma nin memorandum of understanting kaibanan an ALECO.
Nilinaw man ni Galero na kun an sarong household an nagkonsumo sana nin P200 sa bulanan na kuryente, an natatadang P100 an maipagpapadagos hasta sa masunod na bulan hasta sa makumpleto na makonsumo an kabilugan na P300.
Sinabi kan opisyal na an lakdang na ini kan lokal na gobierno an dakulang tabang para sa mga nagtitios na miyembros-konsumidores.
Source: Bombo Radyo Legazpi