Matagumpay na isinagawa ang Hands-Only Cardiopulmonary Resuscitation (CPR) at Foreign Body Airway Obstruction (FBAO) Management Training sa pamayanang katutubo sa Puerto Galera, bilang bahagi ng patuloy na adbokasiya para sa kaligtasan at kahandaan sa oras ng emerhensiya noong
Oktubre 14, 2025.
Dinaluhan ito ng mga kinatawan mula sa iba’t ibang katutubong komunidad sa mga barangay ng Baclayan, Villaflor, Dulangan, Tabinay, Sabang, Balatero, San Isidro, at Aninuan. Sa pamamagitan ng pagsasanay, nabigyang kaalaman at kasanayan ang mga lumahok sa tamang pagtugon sa mga insidenteng maaaring magbanta sa buhay — gaya ng pag-atake sa puso o pagbara sa daanan ng hangin.
Ang programa ay naisakatuparan sa tulong ng Ayala Foundation, katuwang ang Provincial Health Office II sa pangunguna ni Dr. Cielo Angela Ante, at ang Municipal Government Department Head I ng Puerto Galera, Ms. Gemma Adarme.
Binigyang-diin ng mga tagapagsanay ang kahalagahan ng “Hands-Only CPR” — isang simple ngunit epektibong paraan ng pagbibigay-unang-lunas gamit lamang ang mabilis at tuluy-tuloy na pag-compress sa dibdib ng biktima. Ipinamalas din sa mga kalahok ang tamang paraan ng pagtanggal ng bara sa daanan ng hangin, na isang karaniwang insidente lalo na sa mga bata at matatanda.
Sa pagtatapos ng aktibidad, bitbit ng bawat kalahok hindi lamang ang bagong kasanayan, kundi pati na rin ang kumpiyansa at pananagutan sa kaligtasan ng kanilang pamilya at komunidad.
Ang tagumpay ng programang ito ay patunay na sa pagtutulungan ng mga institusyon at lokal na sektor, maipapasa natin ang mahahalagang kaalaman tungo sa mas ligtas at handang pamayanan.
Source: PHO Oriental Mindoro