LEGAZPI CITY- Padagos na pigmo-monitor kan Albay Public Safety and Emergency Management Office an kamugtakan kan mga Mayon evacuees sa tahaw kan matinding init kan panahon.
Marurumduman kaya na rinibong mga residente na ipig-ebakwar huli sa aktibidad kan bulkang Mayon an nagtetenir pa sa evacuation centers hasta sa ngunyan.
Segun ki APSEMO Head Bobby Cristobal sa intrevista kan Bombo Radyo Legazpi na nakikipag koordinar sinda sa mga local disaster risk reduction and management offices ngani na mahiling an presenteng sitwasyon.
Sinabi kan opisyal na sa ngunyan, wara man na nakakaabot sa saindang opisina na anuman na agrangay na nangangahulugan na napapamayuhan man nin matanos kan mga lokal na gobierno an sitwasyon kan mga evacuees.
Sa ibong kaini, sinabi ni Cristobal na bukas an saindang opisina na magtabang enkasong kaipuhan nin suporta kan mga local government units sa pagmamanehar kan sitwasyon urog na ngunyan na summer season.
Source: Bombo Radyo Legazpi