Dagos na nagpakilos an Department of Social Welfare and Development (DSWD) Field Office V (Bicol) kan mga Angel in Red Vests tanganing maghatod nin dagliang ayuda asin pinansyal na suporta sa mga pamilyang naapektaran kan makangingirhat na sunog na nangyari sa Sorsogon City Public Market kan Sabado, Oktubre 24, 2026. An insidente nagresulta sa pagkasawi nin limang katawo asin nagbilin nin grabeng kamondoan sa saindang mga pamilya.

Sa paggiya ni DSWD Bicol Regional Director Norman S. Laurio, dagos na ipinakilos an Assistance to Individuals in Crisis Situation (AICS) program tanganing makapagtao nin pinansyal asin emosyonal na suporta sa mga pamilyang nagdadalamhati. Kan Oktubre 25, 2026, binisita kan mga social worker kan DSWD an mga pamilya kan mga nasawi asin nagtao nin Psychological First Aid (PFA) tanganing tabangan sinda na makayanan an grabeng kamondoan asin emosyonal na epekto kan pagkawala kan saindang mga namomotan.

An Crisis Intervention Section (CIS) kan Sorsogon City Satellite Office nagtao nin ₱10,000 na cash relief assistance sa lambang pamilya kan limang nasawi, o kabuuang ₱50,000, tanganing makatabang sa saindang mga pangangaipo asin gastos sa panahon kan paglamay. Dugang pa digdi, inaasikaso man an funeral assistance tanganing magaan-gaan an pinansyal na pasan kan mga pamilya sa mga gastos sa pagpalubong kan saindang mga namomotan.

Samtang, nakatakda man na bisitahon kan DSWD team an mga nakaligtas na nakaospital tanganing magtao nin psychosocial support asin pinansyal na ayuda base sa saindang mga pangangaipo. Sa paggiya ni President Ferdinand “Bongbong” Marcos Jr. asin sa direktiba ni DSWD Secretary Rex Gatchalian, padagos na pinapalig-on kan DSWD Bicol an mga pag-aksiyon tanganing masigurado na makakaresibe nin angay na tabang an gabos na pamilyang naapektaran kan trahedya. Ini nagpapahiling kan padagos na pagtios asin pagmalasakit kan gobyerno sa mga pamilyang nag-agi nin grabeng kalisdanan.

Leave a Reply

Your email address will not be published. Required fields are marked *