TAYTAY, Rizal – Idinaos ng Rizal Information Officers’ League (RIOL) ang kanilang General Meeting noong Biyernes, Hunyo 26, 2026, sa Taytay, Rizal, kung saan muling pinagtibay ang mahalagang papel ng mga government information officer sa pagpapalaganap ng tama, napapanahon, at mapagkakatiwalaang impormasyon sa publiko.
Sa kanyang mensahe, binigyang-diin ni Philippine Information Agency (PIA) Calabarzon Regional Head Ma. Cristina Arzadon ang mahalagang gampanin ng mga information officer bilang tulay sa pagitan ng pamahalaan at ng mamamayan. Ayon sa kanya, ang paghahatid ng wasto at napapanahong impormasyon ay mahalagang salik sa pagsusulong ng mabuting pamamahala at pagpapabuti ng kalidad ng buhay ng mga Pilipino.
Samantala, ibinahagi rin nina Kier Gideon Paolo Gapayao at Mark Bryan Lito, kapwa dating PIA Rizal Government Information Center Coordinators, ang kanilang pananaw hinggil sa kahalagahan ng epektibong komunikasyon sa pamahalaan. Binigyang-diin nila na ang malinaw, tumpak, at maagap na pagbabahagi ng impormasyon ay nakatutulong sa pagpapalakas ng transparency, pananagutan, at tiwala ng publiko sa mga institusyon ng gobyerno.
Aniya, lalo pang nagiging mahalaga ang tungkulin ng mga government information officer sa panahon ng paglaganap ng kakulangan sa impormasyon at pag-usbong ng kawalan ng tiwala ng publiko sa mainstream media. Dahil dito, hinikayat ang mga information officer na patuloy na maging responsable, tapat, at aktibo sa pagbibigay ng beripikado at makabuluhang impormasyon sa kanilang mga komunidad.
Nagsilbi rin ang pagpupulong bilang pagkakataon upang higit pang pagtibayin ang ugnayan ng mga information officer sa Rizal at palakasin ang kanilang sama-samang adhikain na magsulong ng mahusay na komunikasyon para sa mas epektibong paghahatid ng serbisyo publiko.
Source: PIA CALABARZON