Nakisumaro an mga Legazpi-Daraga jeepney drivers sa ikinasar na transport strike ngonian na aldaw nin Huwebes, Marso 19, ini kasunod kan padagos na paghalangkaw kan presyo kan produktong petrolyo sa nacion.
Segun ki Legazpi-Daraga Jeepney Operators and Drivers Association (LEGDAJODA) Former President Ariel Brimon, sa intrevista kan Bombo Radyo Legazpi, desisyon mismo kan mga driver na makisumaro huli kan sobrang langkaw kan presyo kan krudo na padagos na nakakaapektar sa saindang pang-uro aldaw na pamumuhay.
Paliwanag niya na kun dati na nagkakantidad nin P56 an presyo kan petrolyo, nasa P1,000 an saindang nakokonsumo sa maghapon alagad sa presente na nagsasakat sa labi P100 an presyo kan diesel an nagpapakol na sa P2,000 an sainda nang nakokonsumo.
Segun saiya na kun dati nakakauli pa siya nin P800 hasta P1000, alagad sa ngunyan nasa P300 na sana an saiyang naiuuli para sa saiyang pamilya.
Pagdoon pa niya na sarong insulto para sainda an pagdugang nin P1 sa ibong kan paghalangkaw na presyo nin krudo.
Kahaputan man ni Brimon kun sagkod nuarin mataong ayuda an gobierno huli sa dae makakaabot nin sarong semana an ibanarewas na P5,000 na ayuda urog na sa mga siring niya na may pigpapaklaseng mga aki.
Kahagadan kan saindang grupo na tanggalon an buwis sa krudo nganing magbaba an presyo kaini huli sa pigsasamantala kan nagkapirang oil companies ini na kun sain pigsasabing wara na suboot sindang stock nin krudo maski igwa pa, mantang an iba an nagsasarado.
Mientrastanto, magpapadagos an nasabing transport strike sagkod Biyernes, Marso 20; mensahe man niya na sa mga commuters na masabutan sinda huli sa dae man suboot maabot sa pagwelga kun dae sinda piggigipit kan gobierno.
Source: Bombo Radyo Legazpi