Bilang bahagi ng pagdiriwang ng Shark Conservation Week 2025, pormal na binuksan ang Shark Conservation Educational Exhibit nitong Huwebes, Hulyo 17, 2025 sa SM City Puerto Princesa.
Layunin ng eksibit na itaas ang kamalayan ng publiko tungkol sa kahalagahan ng mga pating at iba pang lamang-dagat sa pagpapanatili ng kalusugan ng ating mga karagatan.
May temang “Sharkada sa Bawat Isla: Empowering the Shark Conservation Network Across the Philippines,” tampok sa eksibit ang natatanging papel ng Pilipinas bilang isang pandaigdigang sentro ng pagkakaiba-iba ng mga species ng pating at pagi. Binibigyang-diin din nito ang mahalagang gampanin ng mga hayop na ito sa ekolohiyang pandagat.
Ipinapakita sa eksibit ang iba’t ibang interactive at educational na display tungkol sa mga uri ng pating, pagi, at chimaera. Tampok din dito ang mga Important Shark and Ray Areas (ISRA) — mga lugar sa Pilipinas na mahalaga para sa kaligtasan at reproduksyon ng mga naturang lamang-dagat.
Makikita rin ng mga bisita ang mga life-size na modelo, touchscreen panels, video presentations, at mga visual timeline ng mga hakbang sa konserbasyon. Layunin ng mga ito na ipakita ang kagandahan at kahalagahan ng mga pating at pagi, gayundin ang mga banta sa kanilang kaligtasan gaya ng labis na pangingisda, pagkawala ng tirahan, at pagbabago ng klima.
Umaasa ang mga tagapag-organisa ng eksibit na mahikayat ang mga lokal na komunidad lalo na sa mga baybaying-dagat na makilahok sa mga hakbangin para sa pangangalaga sa mga pating at pagi. Sa pamamagitan ng edukasyon at pagtutulungan, nais nilang palakasin ang network ng mga tagapagtanggol ng ating yamang-dagat.
Source: Palawan News